Christian Schreibmüller
OBST

Obst a poa foische Kotzn Bussi, Bussi gibst
in Hollywood, weu`s da`r aan Oscar eineschleiman,
obst midn Seidnaunzuuch
med de Schlaumpm auf da Raumpm stehst,
jo, oda obst dahaam a oide Knacker
med aan Griagl Bia in d´ Waumpm stesst...

Ob`s dar aan Baldachin iwa dei Glotzn hoidn,
drunt in Afrika, jo, weusd` ois Prinzgemoi
a poa vaschdöade Schwoazze bsuachn duast,
jo, oda obst di in da Tramway
ba de aundan Schwoazzn deppad außereedn muaßt,
du host da denkt, es is heid Toog da offnan Tramway...

Obst lässig außelossn kaunst,
du foast need dein Nobööpreis hoin,
und sowos brummst ois wia
„dea kau ma bleibm gstoin“,
jooo, oda obst med Miah und Nood
no grod aufs Beislheisl kummst
und donn dei Jopperl doo noo aunschbeibst ...

Obst med dein Paartna, deina Paartnarin
aan Baam ausreißn wüüsd vua Glick,
jo, oda obs woaundas „Klick“ moochd,
Haundschöön näämle, hergestellt in Wien, –
jo, weustas umbrochd host, dei Paartnarin ...

Obst med da Scheenheidkeenechin
vo gaunz Gagausien aan Ziagl moochst,
jo, oda obstas gaunz alaaa
in deina koidn Buude sööwa moochst...

Obst Keazzln schluckst in Vaticano,
bis da Pobst schreid: „Duu need aa no!“
Obst da, drunt in Santropee
eineziagst aan Mördaschnee,
obst med sex aundre Millionaar
dia gaunz a söötns Exemplaar
von aan Waraan heabroodn losst,
vo deen´ s grood dreizehne noo geewad,
wonn dea aane do noo leewad ...

Obst in aan Gurmeelogäu
Foröön auf frisch geeistn
Schnecknschleim med Minzparfee vaputzt,
jo, oda obst dahaam
dein vuavualetztn Zwüüfö putzt ...
Obst Schbitznobst aus Rio eifliang losst,
jo, oda obst aan Kilo Zwetschgn
vo dein Nochban midgeh losst.
Ob Kaviar in Beedaschbuag,
ob Quargln in da Rozznbuag ..:

Aaa ba da ollagreeßtn Freid
Is da Aanes hoffentlich gloa:
Nämle, dass von Aunfaung au,
scho olleweu, de gaunze Zeid
und iwaroi da Wuam drin woa.
Ollas, woost gmoochd host,
woa oiweu schoo gfeud ...

Christian Schreibmüller

Geb. 1949 in O.Ö., lebt`in Wien. Mitbegründer des Wr. Flohmarkts 1972, der “HOSI” 1979, des Anarchistenzentrums Gassergasse, “GAGA”, der “Libertine” 1986, Fotograf, Journalist (Wiener/Wienerin, Stern, Profil etc.) Autor, Schauspieler, Filmer und Fernsehgestalter diverser Sender, Fotoausstellungen im In- und Ausland, Fotoband über Sizilien, Lyrikband “Phantasiedehitze”, Hg. der Anthologie „Ungehaltene Rede“ (2008). Veröffentlichungen in diversen Literaturmagazinen. Veranstalter literarischer Lesungsreihen und bekannter Poetry-Slammer. mehr...